"Versos misurados. Poetas, poesias, sentimentos" Rassigna culturale in Orune
In su mese de abrile, sa biblioteca de Orune in collaboratzione cun su Cunsòrtziu de pùblica letura "Sebastiano Satta" e de s'assòtziu "Bocheteatro", at organizadu una rassigna culturale intitulada "Versos misurados. Poetas, poesias, sentimentos".
Su percursu est cumintzadu cun sos poetas de Orune, at sighidu cun sa letura de Sos Sinnos de Michelangelo Pira, a pustis sos cantos de libertade e at agabadu cun sa letura de sa Divina Commedia de Dante Alighieri.
Sàbadu 7 de Abrile ant cumintzadu cun sos vates orunesos, chi cun sos versos issoro ant cantadu sèculos de istòria dassende una testimonia bia de su tempus coladu. Sos versos de sos poetas sunt istados declamados dae Giuanne Carroni accumpangiadu in custa ocasione dae su tenore orunesu "Nunnale". Sos autores tzitados sunt istados Giuanne Sotgiu, Zosepina Unida e Tzilipu Coccone, ma importàntzia prus manna at tentu Antoni Montesu, unu poeta giòvanu mortu antis de su tempus in sa tzitade de Gènova, chi at dassadu una produtzione poètica manna meda e de valore bonu.
Sàbadu 14 de Abrile sos apassionados orunesos ant pòdidu godire de sa letura de Sos Sinnos de s'antropòlogu bitzichesu Michelangelo Pira, fata semper dae Giuanne Carroni, chi fiat acumpangiadu dae su sax de Simone Pala.
Martis 24 de Abrile, sa die in antis de sa festa de sa liberatzione, Orune at dedicadu unu sero a sos cantos de sos òmines e poetas chi ant gherradu contra a ogni totalitarismu. Giuanne Carroni at letu sas òperas de poetas italianos comente Ungaretti e Quasimodo ma finas de poetas internatzionales comente s'ispagnolu Neruda, su palestinesu Abu Manu, su curdu Sherco Becà e s'arabu Darwschi. Non est mancadu un'ammentu particulare a Frantziscu Masala e pro cuntzare, tziu Bernardinu Mangia, partigianu orunesu de 88 annos, at faeddadu de s'esperièntzia sua in sa segunda gherra mundiale, contende istòrias de dolore e crudelidade chi l'ant signadu sa bida.
S'ùrtima die, sàbadu 28, Massimu Goddi, unu poeta orunesu giòvanu, at abertu sa manifestatzione cun sa declamatzione in fiorentinu tretzentescu de sa Divina Commedia. Su sero est sighidu cun sa letura fata dae Giuanne Carroni de sa tradutzione in sardu de sa Commèdia dantesca de prade Paulu Monni, retore de sa crèsia de sas Gratzias de Nùgoro. S'òpera Càntigos de sa Commèdia Divina, publicada in su 2002 dae s'editore Della Torre de Casteddu, est su resurtadu de binti annos de trabballu in ue prade Monni, mancari siat durgalesu de nàschida, at usadu totu sas variantes de sa limba sarda, pro torrare un'òpera su prus chi si podet aguale a s'originale, rispetende∙nde sa musicalidade e sos colores. Carroni at declamadu su cantu primu, su de chimbe e su de trintatres.
Gosi est agabadu su mese orunesu dedicadu a sa cultura e a sa poesia, ma Orune no est nou a initziativas de custa casta e luego ant a tancare sas iscritziones pro su prèmiu de poesias "Lilinu Brau" sighidu meda dae giòvanos e mannos e abertu a sos orunesos ma finas a sos istràngios . [Frantzisca Monne]
In su mese de abrile, sa biblioteca de Orune in collaboratzione cun su Cunsòrtziu de pùblica letura "Sebastiano Satta" e de s'assòtziu "Bocheteatro", at organizadu una rassigna culturale intitulada "Versos misurados. Poetas, poesias, sentimentos".
Su percursu est cumintzadu cun sos poetas de Orune, at sighidu cun sa letura de Sos Sinnos de Michelangelo Pira, a pustis sos cantos de libertade e at agabadu cun sa letura de sa Divina Commedia de Dante Alighieri.
Sàbadu 7 de Abrile ant cumintzadu cun sos vates orunesos, chi cun sos versos issoro ant cantadu sèculos de istòria dassende una testimonia bia de su tempus coladu. Sos versos de sos poetas sunt istados declamados dae Giuanne Carroni accumpangiadu in custa ocasione dae su tenore orunesu "Nunnale". Sos autores tzitados sunt istados Giuanne Sotgiu, Zosepina Unida e Tzilipu Coccone, ma importàntzia prus manna at tentu Antoni Montesu, unu poeta giòvanu mortu antis de su tempus in sa tzitade de Gènova, chi at dassadu una produtzione poètica manna meda e de valore bonu.
Sàbadu 14 de Abrile sos apassionados orunesos ant pòdidu godire de sa letura de Sos Sinnos de s'antropòlogu bitzichesu Michelangelo Pira, fata semper dae Giuanne Carroni, chi fiat acumpangiadu dae su sax de Simone Pala.
Martis 24 de Abrile, sa die in antis de sa festa de sa liberatzione, Orune at dedicadu unu sero a sos cantos de sos òmines e poetas chi ant gherradu contra a ogni totalitarismu. Giuanne Carroni at letu sas òperas de poetas italianos comente Ungaretti e Quasimodo ma finas de poetas internatzionales comente s'ispagnolu Neruda, su palestinesu Abu Manu, su curdu Sherco Becà e s'arabu Darwschi. Non est mancadu un'ammentu particulare a Frantziscu Masala e pro cuntzare, tziu Bernardinu Mangia, partigianu orunesu de 88 annos, at faeddadu de s'esperièntzia sua in sa segunda gherra mundiale, contende istòrias de dolore e crudelidade chi l'ant signadu sa bida.
S'ùrtima die, sàbadu 28, Massimu Goddi, unu poeta orunesu giòvanu, at abertu sa manifestatzione cun sa declamatzione in fiorentinu tretzentescu de sa Divina Commedia. Su sero est sighidu cun sa letura fata dae Giuanne Carroni de sa tradutzione in sardu de sa Commèdia dantesca de prade Paulu Monni, retore de sa crèsia de sas Gratzias de Nùgoro. S'òpera Càntigos de sa Commèdia Divina, publicada in su 2002 dae s'editore Della Torre de Casteddu, est su resurtadu de binti annos de trabballu in ue prade Monni, mancari siat durgalesu de nàschida, at usadu totu sas variantes de sa limba sarda, pro torrare un'òpera su prus chi si podet aguale a s'originale, rispetende∙nde sa musicalidade e sos colores. Carroni at declamadu su cantu primu, su de chimbe e su de trintatres.
Gosi est agabadu su mese orunesu dedicadu a sa cultura e a sa poesia, ma Orune no est nou a initziativas de custa casta e luego ant a tancare sas iscritziones pro su prèmiu de poesias "Lilinu Brau" sighidu meda dae giòvanos e mannos e abertu a sos orunesos ma finas a sos istràngios . [Frantzisca Monne]
Nessun commento:
Posta un commento